يا اخواني... اكيد في بالمنتدى ناس متزوجين وانا اخاطب بهذا الموضوع الرجال فقط..؟؟ الموضوع الأصلى من هنا: منتديات عالم المرأة http://www.movieszoom.net/f59-montadat12360.html#post222750 دايما نسمع وخاصة في دول الخليج ان بعد سنة من الزواج يصير ملل وفتور بين الزوجين.. وعاد تكثر المشاكل واللي اكثرها تكون سخيفه وصغيرة بس تكبر وتكبر لين توصل لحد الطلاق الله يكافينا شره ويبعدنا عنه وجميع الاخوان المتزوجين واللي على وشك زواج ان شالله
وطبعا حبيت احط هالموضوع علشان يستفيدون منه الاخوان المتزوجين ويعيشون حياة هنيئة مع زوجاتهم وصدقوني والله اكثر هالافكار بسيطة وما تاخذ لاوقت ولاجهد ولافلوووووووس بس تزيد المحبة بين الزوجين والتفاهم صدقوني
لما ايكون عندكم مناسبة عيد زواجكم ولا عيد ميلادها ؟؟ طبعا هي بتموت عشان تعرف انت شنوبجيب لها هدية ؟؟ وكل ساعة تبي تضرب لك خشات ونغزات عشان تذكرك بالمناسبة بس انت يا ابو الشباب سوا روحك ولا تدري بالسالفة ومطنش حدك وقول لها بوديج اليوم بيت اختي او بيت امي يبون ايشوفونج ؟؟؟ وانت روح بيتكم وزينه بالبالونات والشموع والزين .........الخ ؟؟ شغلات بسيطه تلقاها عند بو امية ..ومحضر لها الهدية اللي خاطرها ونفسها فيها ؟؟ مثل عطر نظارة ساعة شئ ذهب خاتم اسواراة ؟؟؟ وطبعا لا تنسى تشتري العشاء الجاهز وانت بعد اتجهز روحك من لبسك وكشختك ؟؟ تمر عليها وتوديها البيت وتفاجأها بالحفلة الصغننونة اللي مسونها ؟؟؟
الفكرة الثانية :
تقول لها يا ام فلان روحي جيبي الغرض الفلاني من السيارة بسرعة ضروري ؟؟ واتسوي روحك مشغول بشئ وما تقدر تروح تجيبه ؟؟ طبعا هي بتروح سيدة على السيارة بس انت بتكون محضر لها مفاجأة وردة حمراء ندية مع رسالة حب او شعر جميل ؟؟ تحطه لها فوق الغرض اللي طلبت منها اتجيبه ؟؟
الفكرة الثالثة :
لما تعزم اصحابك مثلا للبيت واتكون زوجتك تاعبه نفسها بالطباخ والنفاخ وما خلت طبخة الا وسوتها ؟؟؟ وحتى لو كان قدوع بسيط ؟؟ من كل شي يتعبون بنات اليوم بعد ما تودي الاكل للمجلس أو للدوانيه والجماعة يخلصون الاكل كله ويحشونه حش ؟؟ تروح لها تجيب الشاي وبعدين اتسوي لها بأصبع الابهام انتي جذي ؟؟ عرفتوا الحركة ؟؟ عشان اتبين لها ان الاكل كان تمام وكل شئ كان مميز ولذيذ ولا تنسى طبعا كلامك ومدحك للأكل حتى لو كان مغبر ومالح وماله طعم ؟؟ تعرف ان التعب اللي تحس فيه كله بيروح من كلماتك اللي صارت مثل البلسم على قلبها ؟؟
الفكرة الرابعة :
لما انت تجي من الشغل واهي تكون مشغولة بالطباخ وما تدري ؟؟ مو تقعد تصارخ يا فلانة شنو صار بالغداء خلص والا لاء ؟؟ وكأنك ملهوف ؟؟؟ ادخل بالعدال وبدون ما تحس فيك وروح لها المطبخ وفاجأها وضمها اليك ؟؟( اعذروني على هالكلمه) وقول لها طبعا من بعض الكلام الحلو وانك مشتاق لها وطوال عملك كنت تفكر فيها؟؟ وحتى لو كانت ريحتها ثوم وبصل لما اتشوف منك هالحركة بسرعة بتخلص الطباخ وبتعدل روحها وتسنع حالها ؟؟
الفكرة الخامسة :
طبعا يوم الاجازة الزوجة محتاجة للتغيير والطلعات والروحات بس في رجال ما يودون زوجاتهم الا بالحنة والزن على دماغهم يالله يرضون ؟؟ بس انت عاد لازم اتصير هالمرة غير اتقولها جهزي نفسج بنروح بيت واحد صديقي طبعا تكون مرته تعرف مرتك ؟؟ طبعا هي بتصدق ؟؟؟ وحاول في السيارة تكون الاجواء مختلفه وتقول لها كلام حلو عشان تحلو الطلعة ؟؟ بس المفاجأة انك ما راح توديها بيت صديقك لا بتوديها المكان اللي هي اتحب اتروحه او مكان حلو ما راحته مثلا مطعم- البحر- سوق( وهذا اكثر مكان يعجبهم) ومافي مانع تقولها اليوم لج هالمبلغ الفلاني واشتري اللي تبينه.. طبعا من غير مصروفها الخاص هذا المبلغ... مو تعطيها مصروفها وتقص عليها.؟؟؟ او أي مكان خاطرها اتروحه ؟؟؟ والله انها بتسانس وما بتصدق؟
هاذي الافكار اللي جت على بالي وان شاء الله اذا حسيت الموضوع عجبكم راح أألف لكم كم فكرة على كم حركة ؟؟؟ واللي عنده افكار اتمنى انه مايبخل علينا ويعطينا من افكاره الحلوه عشان نستفيد جميعا..
وتذكروا يا اخواني ان زوجاتكم قلوبهم طيبة ويحبونكم بس محتاجين منكم اتحسسونهم بالحنان والحب وادلعونهم اشويه ؟؟
والله يهنيكم مع بعض ويجعل المودة والرحمة تعشش بقلوبكم ؟؟
الرئيسية
