انا عايزة اكتب موضوعى ده لكل واحدة زعلانة ومكتئبة بسبب شعرها المتساقط الخفيف المتقصف الهايش الخشن وجربت كل حاجة معاها ومفيش حاجة جابت نتيجة انا يا جماعة موش هكتب وصفة تجربيها ولا علاج تجيبه من الصيدلية لكن هكتب العلاج الاساسى واللى هيساعدك تتغلبى على انتى فيه هو
الصبر والرضا
كملى كلامى واوعى تخرجى
والله ده احسن علاج
اوعى حد يقول دى بتكتب وموش حاسة بينا اتلاقيها
معندهاش اى مشكلة انا عايزة اقول يا جماعة انى الحمدلله على كل حال ربنا ابتلانى بانه شعرى خالص مبقاش فيه ولما ببص لنفسى فى المراية اقعد اعيط عليه وبقيت انفجر اكتر كل لما اشوف موضوع فى منتدى الزواج لازم واساسى يكون فى مواصفات للشعر وبقول انا كده موش هتجوز خالص اللى عايزك هيرضى بيكى زى ما انتى والاصل انه يدور عالدين والاخلاق وما يدور على الشعر ولا البيضا ولا السمرا ضيعت اوقات كتيرة بسببه وعايزة اقول انى لفيت عالمنتديات كلها علشان الاقى حل لشعرى وروحت لدكتور وللاسف كان غلطة وصرفت فلوس عالفاضى وما استفدتش حاجة من العلاج لانى كنت عايزة النتيجة فى وقتها
لكل اللى ابتدت فى اى علاج او على اى وصفة اصبرى عليه وارضى بكل اللى ربنا قسمهولك وحطى فى بالك فى الاول وفى الاخر انه ربنا هو الشافى موش الوصفة ولا العلاج واكترى من الاستغفار وادعى ربنا كتير وطلعى صدقات للفقراء ومتخليش موضوع شعرك يأثر عليكى ويحبطك ويبعدك عن ربك وخدى فى بالك انه الاساس فى علاج الشعر او اى مرض انه النفسية تكون مرتاحة ريحى نفسك وتوكلى على الله وباذن الله هتلاقى النتيجة اللى هترضيكى انا بكتبلكم الكلام ده وانا واثقة فيه مليون فى الميه والله واسئل الله العظيم ان يكشف عنا جميعا الضر