الزواج على الطريقه المصريه الجزء الثاني العريس ده بيتنطط على ايه
- اهلا فكرني انا هشام ايوه العضو الي مغلس على المنتدى كله بمواضيعه الي ماحدش بيقرأها ولو حد اتجنن في عقله وقراها غلط بيقفل الصفحه بالظبط بعد دقيقتين .. ويلعن المنتدى وسنينه السودا الي خلى كل من هب ودب يكتب الي هو عاوزه ويعكنن على خلق الله - لكن بصراحه الي يعكنن ان اليومين دول اني عامل فيها عادل امام وعمال اكتب كوميدي ..( ادعولي ربنا يشفيني )
- فكرين الجواز على الطريقهالمصريهالجزء الاول .. الي وعدتكم ان هيكون لها اجزاء تانيه ( سامع الي بيشتم على فكره مش عجبك الجزء الاول ما تقرأش الجزء التاني وانت الي خسران ) طبعا جاء لي الاف الرسائل على الاميل وتلقيت مئات الكومنتات وهناك عضوات تمرغن في التراب وبكين بدل الدموع دم لاكمل الجزء التاني .. ايه ؟ بتقول اني هجاس وفشار !!! عادي عاوزيني اقول ايه .. اقول ان ما فيش حد اصلا خد باله ان الموضوع له جزء تاني وان الي خد باله قال يارب ما ينزله مش ناقصة خفة دم اهله الواد ده ... لا طبعا مش هاقول كده لان ده ماحصلش في عضوه بحالها سألتني عن الجزء التاني ( صانعة السعاده ) ربنا يكرمها ويوفقها وتشوف ولادها متجوزين ومتهنيين يارب .. طلبت مني الجزء التاني .. يعني انا مش هجاس ولا حاجه . - هاكلمكم النهارده عن اهم حاجه في الجواز وهي الاختيار طبعا العريس خلاص عمل المعجزه الكبرى وحقق الهدف السامي وجاب شقه .. طبعا شقه في اي دوله حاجه بسيطه وحق من حقوق المواطن لكن لما يكون تعداد دولتك قرب على 90 مليون في عين العدو وخمسه وخميسه وياناس ياشر كفايه قر .. تعرف انك لما تحصل على شقه يبقى دخلت التاريخ من اوسع ابوابه ولما تجهزها وتشطبها يبقى كده عملت ملحمه تاريخيه سيتكلم عنها التاريخ طويلا وتوضع بجوار احداث تاريخيه عظيمه مثل الحرب العالميه الثانيه واكتشاف القنبله الذريه واحتراف هيفاء وهبي الغناء الموضوع الأصلى من هنا: منتديات عالم المرأة http://www.movieszoom.net/f59-montadat340489.html#post4516947 - طبعا هتفتكروا ان بعد كده الجواز هيكون سهل لانه مش هيبقى فاضل غير العروسه ونأتي هنا لمربط الفرس والحمار وكل الحيوانات العاشبه .. انه الاختيار وما ادراك ما الاختيار في حياة اي انسان مش بس الجواز لا كمان الكليه والتخصص والمهنه .. الحياه هي سلسله من الاختيارات ولكن لان الزواج هو الاهم ولانه مره واحده ولانه مثل البطيخه طبعا لا اقصد بالبطيخه المراه كما لااقصد بها كرش الرجل .. الحاجات الجميله دي هتتحقق بعد الزواج لكن احنا بنتكلم دلوقتي عن ان البطيخه الي هتاخدها ياحمرا يا قررررررررررررعه والبس ياريس بقيت عمرك - في مصر وكل الدوله العربيه رغبه محمومه من البنات على الجواز البت بتبقى متسربعه سربعه غريبه يعني البت لسه ما طلعتش من البيضه وتلاقيها مالهاش سيره غير عن الجواز .. كل قعدات النميمه عنه .. ( عارفه البت هدى مش اتخطبت اول امبارح وايه خطيبها قمر موووووووووز وهي معفنه ومفعصه وما يتبصلهاش مش عارفه خطيبها ده كان عمي في نظره ولا ايه .. وتمصمص شفايفها في حسره وتقول الحظ لما يواتي يخلي الاعمى ساعاتي .. طبعا بيكون في كلام كتير عن مكياج العروسه الي خلاها شبه البلياتشو وفستانها الي اجرته من عم عبده المكوجي والي بالكتير اوي شبه بدلة شعبان عبد الرحيم . - طبعا الكلام ده بينهم وبين بعض انما لما حد يجيب سيرة الجواز ادامها تقول بالاطه ( انا ما بفكرش في الموضوع ده دلوقتي انا عاوزه اثبت ذاتي الاول ) .. طبعا جمله مستهلكه وحمضانه بتيجي في كل الافلام العربي وانا بصراحه مش عارف ايه ذاتها دي وهتثبتها ازاي .. على اساس ان ذاتها دي نظرية فيثاغورث ولا النظريه النسبيه -عندنا في مصر في كل الاحصائيات التعبانه المفتعله بتاعة الحكومه بيقولوا ان عدد البنات بالظبط زي عدد الصبيان لا ده الصبيان زايدين شويه .. وطبعا لاني واثق من كفائة الجهاز الاداري المصري الي بينافس الكونجرس الامريكي ( بصراحه مش عارف ايه علاقه الجهاز الاداري بالكونجرس بس باتفذلك ) فأنا متأكد ان الموظف الي علاقته بالشغل انه يروح يقرا الجريده ويشرب كوباية الشاي وبعد كده يتكل على الله يروح الساعه 12 او يروح شغلانه تانيه بعد الظهر .. الموظف ده مستحيل ينزل يعد في خلق الله ويشوف الستات اكتر ولا الرجاله ثم ان معلش في ستات بيقصروا شعرهم وبيلبسوا بناطيل .. وفي رجاله بي .... احم احم .. اكيد انتم فاهمين فهيميزهم ازاي من بعض؟ عشان كده بيقول نريح الناس ونقول انهم حبايب ما فيش حد اكتر من حد عشان ماحدش يزعل - بس انا طبعا بعبقريتي المعهوده ممكن اقول ان الستات اكتر واثبت ده بنفس الطريقه الي البنات هتثبت بها نفسها .. طبعا هتقولوا طيب هتفرق في ايه موضوع مين الاكتر في الجواز ؟ - اقول لالالا تلاته لا ما هو الرجال عشان اكتر عمالين يتنططوا وشايفين نفسهم (يقعدلهم في عينهم وعافيتهم يارب ) على رأي الست هند صبري ( قالتها في عاوزه اتجوز ) - ازاي الستات اكتر اقولكم .. الستات عندنا في مصر الواحده تقعد تخلف بنت واتنين وتلاته واربعه وما تبطلش خلفه غير لما تجيب ولد .. وطبعا الرجل يقعد يتمسكنلها ويقول لازم تجيبي حد يخلفني ويورثني من بعدي على اساس انه هارون الرشيدي وانه هيورث ابنه العرش .. وطبعا في خلفه في اتنين في تلاته وما فيش ولد وفي الغالب ما بيجيش خالص وده كله يكتر البنات - السبب التاني ان معدل اعمار الستات اكبر من الرجال .. الراجل ياحول الله عليه ما بيستحملش يفضل كابت في نفسه عمال شايل شايل شايل لحد ما يطق يموت مراته بتجيبله الضغط والشلل الرعاش وهو يا ولداه لا بيعرف يعيط ولا يتنيل شاطر بس يقعد يزعق ويجعر لحد ما صوته يروح وضغطه يعلى انما الست المفتريه كل ما تضايق هم دمعتين وخلص الموضوع وتستريح والحياه تبقى زي الفل وزبادي خلاط .. عرفتوا بقى ان الستات اكتر . - طبعاعشان الستات كتير الرجل يقعد يتنطط ويقول لا دي رفيعه اوي ودي تخينه شويه .. ودي شعرها مش اصفر .. وغالبا ما بيبقاش عنده مرايه في بيته او امه مفهماه انه شبه حسين فهمي .. ولما البنات تشتكي الرجاله تقول الرجل ما يعيبوش غير جيبه ... على اساس انه الوليد بي طلال وهو تلاقيه شاب مسنكح والفار يدخل بيتهم يطلع جعان
- الجزء ده للقاريء البطل الي هيقدر يكمل الموضوع من غيرما يصاب بالسكر والضغط وكل الامراض المزمنه .. ومكأفته عندي اني اقوله .. مبروك عشانك انت بس هنزل الجزء التالت وهاتكلم فيه عن الشوفه الشرعيه .. اقصد الشوفه العصريه عشان نكون صادقين مع بعض.. وانصحك بعد ما تقرا المقال انك تروح على اقرب مستشفى وتحط نفسك تحت الملاحظه من 6 شهور ل 3 سنين وربنا يجيب العواقب سليمه يارب
الرئيسية
