أنا حاليا امر بفترة عصيبة من حياتي بصراحة اول مره تمر علي فترة لا محل لها من الاعراب ومدري وش تبي يا عالم أنا شاب خلاص نفذ صبري و صراحة وودي أتزوج بنت الحلال الي أسعدها وتسعدني بس حسبي الله على مجتمعنا للي خلى الزواج أصعب مهمة في العالم لازم قبل الزواج السكن + المهر + الوظيفة تكون متوفرة ولا روح قشر بصل يا بطل
وينهم عن حديث رسول الله عليه الصلاة والسلام ((إذا أتاكم من ترضون دينه وأمانته فزوجوه، إلا تفعلوا تكن فتنة في الأرض وفساد كبير)) المشكلة يا عالم أني لسه طالب و حاليا ادرس في امريكا يعني حتى فكرة الزواج المفروض اشيلها من بالي ولا افكر فيها حتى اتخرج و احصل وظيفة لكني خلاص تعبت و نفذ صبري بعدين الجامعة اللي أنا فيه اكثر من نصفها بنات و حاليا الوقت صيف فلكم ان تتخيلوا الأزمات اللي امر فيها كل صباح الواحد صار والله مايعرف يركز مع الدكتور البنات يحيطون بي بكل جهة [وحدهم المديرون لديهم صلاحيات معاينة هذه الصورة] و صرت اقول الله يعجل بالشتاء بس أنا انسان أخاف الله و أحاول ابعد عن الحرام ادعولي ان الله ييسرها ويفتحها علي خلاص العزوبية بلغت مبلغها معاي وضع مقرف ومزري انا انسان ماعرف اطبخ وصارلي سنتين اكل من المطاعم خلاااص تعبت من اكلهم المقرف اللي يجيب المرض والحمدلله عالنعمة على كل حال صارت عندي مناعة من جميع انواع السموم اللي تخطر البال حتى اصبح الأكل الخايس بنظر غيري لذيذ في نظري اخ بس صرت اقول وين الزوجة اللي بتطبخلي وتنفخلي وتغذي زوجها و ما تاكله الا من يدها [وحدهم المديرون لديهم صلاحيات معاينة هذه الصورة] فزووجتي بشترط انها تكون طباخة محترفة بخبرة سنين [وحدهم المديرون لديهم صلاحيات معاينة هذه الصورة] عشان تعوضني وتنظف بطني من السموم والكيماويات اللي اتجرعها يوميا و للأسف ماني محصل شباب من ديرتي يمرون بنفس حالتي لأني بمنطقة قليلة فيها العرب نسبيا و معظم اللي أعرفهم سلكوا طريق الصياعة و الضياع وانجرفوا ورا شهواتهم شي مبكي والله اسأل الله العظيم ان لا يجعلنا مثلهم و ان يهديهم
فقلت ما اشكي همي الا لله ثم لكم
اهلي مافي امل يزوجوني حتى اتخرج و اتوظف و اصلا مين بيزوج بنته لطالب توه لسه ما توظف ولا تخرج ولا بنى نفسه
لا بارك الله في العزوبية ولا في اللي اخترع العزوبية العزوبية حسب علمي مصطلح جديد نشأ حديثا ليواكب تطورات المجتمع الحديث [وحدهم المديرون لديهم صلاحيات معاينة هذه الصورة] بعدين هل تعرفون ان قانون الزواج في الدولة العثمانية كان اختياري من سن ١٨ الى ٢٥ و اجباري في عمر ٢٥ < لبى قلوبهم شوفوا الناس اللي تفهم واللي ما يملك المال و القدرة عالزواج يعطى من بيت المال كانوا يعرفون ان الشباب لابد ان يتزوجوا في سن مبكر مو زي اليوم هههااي الواحد يوصل 28 و مو لاقي يتزوج فيضطر ان يتدين من كل كائن حي و يخش الحياة الزوجية بديون للسما بس عشان يعف نفسه و بعدين زوجته تنزل موضوع هنا تقول شوفولي حل زوجي بخيل والله المستعان [وحدهم المديرون لديهم صلاحيات معاينة هذه الصورة]
الزبدة
فكرت أني أتزوج أمريكية بدون علم اهلي لكني اكتشفت انه من أغبى الحلول اللي خطرت على بال بشر [وحدهم المديرون لديهم صلاحيات معاينة هذه الصورة] الأمريكيات ما عندهم شغل الخبط واللزق اللي عندنا الواحد يحتاج يديتها شهور قبل ما تفكر بالزواج بعدين بناتهم مو حقين زواج اصلا وبيني بينكم للحين ما عرفت الفرق بين العلاقة بين الزوجين والعلاقة بين الحبيبين فاللي يشوف فرق يقولي وشهو لانهم حتى هم انفسهم مو عارفين الفرق بالعكس صار الواحد عندهم ما يفكر بالزواج لانه هذا يعني ان البنت بتشاركه في حلاله و ليش يتزوج مدام محصل اللي يبيه منها
مافي زي بناتنا لبى قلوبهم [وحدهم المديرون لديهم صلاحيات معاينة هذه الصورة] ربي يحفظهم بنات رزينات عاقلات عفيفات الله يرزقني بنت الحلال بس [وحدهم المديرون لديهم صلاحيات معاينة هذه الصورة]
طولت عليكم أسف لكنها مجرد فضفضة تقبلوها مني و ساموحني عاللغة العربية الممتازة اللي كتبت فيها و ترا هذي اول مشاركة يلا ابغا ترحيب [وحدهم المديرون لديهم صلاحيات معاينة هذه الصورة]
ولا تنسوني من دعائكم و اللي يبغا شي من امريكا يطلب تامرون امر انتم بس لا تكثرون هاه
بااي [وحدهم المديرون لديهم صلاحيات معاينة هذه الصورة]
الرئيسية
