انا الان اداوم بأحد الجهات علشان فترة التدريب اللي بنهاية البكالوريوس واسابيع واخلص واحمل الشهادة اخيرا
ناوي ابتعث امريكا اكمل ماجستير وبعدها دكتوراة اذا الله احيانا والامور الحمدلله متيسرة لان الابتعاث للماجستير بابه مفتوح على مصارعيه فمضمونه البعثة باذن الله عكس بعثة البكالوريس لها شروط
عارف بتقولون بشر امك الله لا يردك وانت وجهك موب وجه دكتوراة وجه ابتدائية وليلي وتخب بعد بس صبركم تجيكم المشكلة اللحين
انا باتزوج بإذن الله لكن اللي معقدني هو ان البنات اللي اقدر اتزوجهم ينقسمون لفئتين
طحالب عديدة خلايا وطحالب خضراء
ههههههههههههههههههه امزح[وحدهم المديرون لديهم صلاحيات معاينة هذه الصورة]
الفئة الاولى بنت ما زالت تدرس بالجامعة لان اصغر من 24 سنة بتكون بالجامعة مافيه بنت مخلصه بهالعمر اتوقع الا قليل مادري ولو كانت مخلصه بتصير قدي الظاهر او اكبر
وهاذي وش اسوي فيها بيصير قدامها مابين سنة الى ثلاث سنين دراسة هنا بالسعودية تكمل بكالوريوس ما اقدر آخذها معي
الفئة الثانية بنت خلصت الثانوي وتبتعث معي بكالوريوس
والكلام بهاذي يطول لكن عمرها بيكون 18 تقريبا
يعني صغيرة وين بعثه وزواج فجأة وعالم مختلف عليها لا لغة ولا دبره بأبلش فيها والله هناك وهالكلام موب كلامي كلام واحد مجرب
وموب على كيفي احصل وحده توها مخلصه الثانوي واهلها موافقين على البعثة و و و الخ
والفارق كبير بنظري بتصير من جيل مختلف وانا ابيها تكون صديقتي قبل ما تكون زوجتي
يعني الفارق اللي ودي فيه سنة او ثلاث بالكثير
عارف ان الاغلبية بيتوطون في بطني ويقولون ما ينفع ومدري ايش لكن هاذي قناعتي ولازم تشوفون لي حل يتماشى معها[وحدهم المديرون لديهم صلاحيات معاينة هذه الصورة]
وانا الحمدلله مابي ازكي نفسي لكن كل من شافني حسب اخوي الصغير ولدي لاني مظهري اكبر بكثير من عمري وعقليتي وكلامي اكبر والدليل قدامكم بالله ما تعطوني من اسلوبي ابو خمسين؟
هههههههههه والله امزح وراكم عصبتوا[وحدهم المديرون لديهم صلاحيات معاينة هذه الصورة]
خلاص بطلت مزح المشرفين كشروا عن انيابهم شكلهم بيحذفون الموضوع
المهم طموحي باختصار ابتعث ادرس ماجستير وزوجتي تدرس ماجستير معي وناخذ كلنا الدكتوراة بإذن الله (ومن يتهيب صعود الجبال يعش أبد الدهر بين الحفر)
وهالشيء مخطط عليه من عمري 17 سنة وكل شيء للآن ماشي على حسب الخطة[وحدهم المديرون لديهم صلاحيات معاينة هذه الصورة]
لو اخذت بنت الثانوي ما يمدي واختلاف الشهادات وسنينها (هي بكالوريوس وانا ماجستير) بيسبب قلق ماله اول ولا تالي بما اقدر اتزوج من هالفئة
وبنت الجامعة بعد ما اقدر اتزوجها للسبب اللي ذكرته فوق
طيب وش اسوي؟
عندي احساس اني مثل اللي يصارخ بغرفة ويقول وين المخرج؟ ثم يجي واحد ويقوله شف الباب وراك ياغبي
قصدي اني متفاؤل ان الحل ابسط جدا مما اتخيل فياليت تكونون قد التوقعات[وحدهم المديرون لديهم صلاحيات معاينة هذه الصورة]
لكن اتمنى فعلا الموضوع ما ينقلب نقاش
كل واحد عاش حياة مختلفة تماماً عن الآخر فاختلاف الآراء والقناعات أكيد
ناظروا للمشكلة من منظور قناعاتي أنا وافتوا علي بخبرتكم انتم
قصدي لحد يقول موب لازم تاخذ زوجتك دكتوراة هذا موب حل .. هذا مثل اللي تقوله اوجد س و ص ثم يقول اوجدت لك س ! موب حل هذا راسب راسب راسب[وحدهم المديرون لديهم صلاحيات معاينة هذه الصورة]
اوجدوا س و ص احسن لكم[وحدهم المديرون لديهم صلاحيات معاينة هذه الصورة]
موفقين يا اخوان وانتظر ردودكم
ولا تنسون النية الطيبة بحل مشكلة اخوكم المسلم حتى يُكتب لكم الاجر
الرئيسية
