بسم الله الرحمن الرحيم ------------------------------ صباح الخير حبيباتي انا داخلة انصحكم نصيحة لوجه الله من حاجة انا عانيت منها و يمكن هي بتختلف من بنت للتانية حسب طبيعة جسم كل بنت و مش شرط العيب فالمنتجات اللي استعملتها ممكن العيب في جسمي بس انا هنقلكم اللي حصلي عشان اي واحدة عنها شك ان ممكن جسمها يبقى زيي تبعد عن اللي هقوله
بنات انا وزني كان طبيعي و جسمي حلو لحد من 6 سنين بعدها ربنا اختبرني و مرضت مرض محتاج اخد كورتيزون لفترة طويلة و خدته لمدة 6 سنوات دوز كبير جدا و كنت كل مرة باخده واوقف ارجع اخس بس حالتي تنتكس لحد اخر مرة وصلت ل 125 كيلو ووزني ثبت.
المهم اني عملت دايت مع دكتورة دايت سعرات عادي و بدون ادوية لان مامتي كانت رافضة و نزلت ل 102 كيلو في سنة تقريبا او 9 شهور و 3 شهور ثبت و نزلت كمان ل 97 و ثبت سنة تقريبا بس بعد ما اتخطبت قلت عايزة اخس تاني .
كنت بدات شهر مارس 2010 اخد ادوية زي ريدكتال و زينيكال و الحاجات دي زينيكال ماثرش عليا في حاجة عادي بس ريديكتال اللي حسيته انه انا زمان مش كان عندي شهية ابدا للاكل انا بس كنت بتخن بسبب الدوا فجاة بقيت باكل كتير و باكل حلويات و معرفش بقيت بقوم من النوم جعانة و جابلي صداع وعصبية ووقفت الادوية دي و بعدها جربت فيا اناناس و سوبر سليم و حاجة تانية شبهه و النتيجة بردو بقيت باكل اكتر و اكتر.
و بعد ما كنت طول عمري مش عندي بطن طلعلي بطن لاول مرة في حياتي مع اني مرة وصلت 125 كيلو و بردو مكنش عندي اي بطن المهم انا مش بطلعت اعط و خدت حبوب اسمها زين اوك سدت نفسي شوية بس كل شوية عالتواليت و كمان صداع جامد و كنت مكملة فيها لحد ما سمعت عن ليبو زين العلبة السودة اللي مكتوب عليها بالاخضر و قلت هسيب زين و اروح للتانية دي اكيد احسن و مفيش تغيير كل مادى باكل اكتر و مش بخس بالعكس بتخن مع ان ناس كتير جدا خسو على الحاجات دي بس دي تجربتي كل ده كان عادي اوك كنت بخسر فلوس اوك كنت باكل اكتر اوك.
كل ده لحد باه ما الشيطان وسوسلي و عايزة اخد فاتاشي ركبت دماغي و قلت لخطيبي يا تجبهولي او مش هعرفك تاني المهم جابه و الكلام ده من شهرين تقريبا من اول رمضان او من شهر ونص انا سالت الدكتورة اللي في الصيدلية و هي كانت مشغولة و بترد عليا كده بس عشان تسكتني عن الدوا و قالت اه كويس و بعد ما اشتريته اخت خطيبي قالتلي يا بنتي ده ملوش فايدة و مش هيعملك حاجة هي خدته ومش خست و زهقت منه.
انا باه خدته و ايه اللي حصلي!! اللي حصلي ان البيريود مش راضية تجيلي جسمي كله اتنفخ بقيت حاسة اني حامل اتخيلو حاسة اني حامل و انا مش متجوزة جتلي كل اعراض الحمل دوخة و نوم و عايزة استفرغ و صدري كبر جدا و بطني ووشي اتنفخ و نعسانة 24 ساعة في اليوم و البيريود مش عايزة تيجي مع اني بقالي 12 سنة بزبط تاريخ الشهر بتاريخ البيريود بتاعتي.
و بدات باه الف عالدكاترة لان كنت هموت ضربات قلبي زايدة اوي و بنام كاني متخدرة و تعبانة بجد مرهقة مش قادرة حتى اتحرك و اخرت لفي دكتور صاحب خطيبي عملي تحليل و قالي الفاتاشي جسمك مش اتقبلو و نتيجة لكده هرمونات جسمك كلها ضربت الحرف قالي كده قلتله ازاي ده هو ملوش علاقة قالي كل دوا بيدخل في تركيبه المواد الفعالة فيه و من جسم للتاني الجسم يتقبل او يرفض
حمدت ربنا و شكرته و قلت ده اختبار من ربنا عشان انا مش سمعت الكلام و بعد ما كان وزني 97 تقريبا وزاد شوية لل 100 في اقل من سنة وصلت 115 بسبب ادوية التخسيس اللي جربتها في نفسي يمكن انا وزني مش باين عليا لاني طويلة شوية بس صدقوني بجد ندمانة ندم مش طبيعي لاني وصلت نفسي لكده و اجلت جوازي وموقفة كل حاجة في حياتي بسبب الاحباط اللي انا فيه
فنصيحة مني بلاش حد يعمل زيي انتي مش هتضمني ايه اللي ممكن يمشي معاكي و ايه اللي ممكن لا سمح الله يتعبتك و جسمنا مش مغامرة انا دلوقتي لو هخس كيلو واحد في الاسبوع انا راضية و مبسوطة اخس بالراحة المهم امشي للاحسن
و على فكرة لكل بنت مش عارفة تتحكم في شهيتها انا هقول كلمة حق و ربنا شاهد عليا انا في اسبوع واحد اتعدلت كل عاداتي الغذائية و قلت شهيتي عن زمان كتير اوك الوزن خسيت بسيط لان البيريود لسه مش عايزة تيجي بس انا حاسة بنفسي خفيت و بقيت احسن
الدايت اللي ماشية عليه هو اللي كاتباه اختنا بقايا امراة الحمدلله من اول ما مشيت عليه راح الجوع اللي بيجيلي فجاة و حتى لو بيجيلي بقيت بسيطر على نفسي يعني بجد حياتي بدات تتعدل الحمدلله ربنا يارب يجزاها خير و في ميزان حسناتها و فعلا طلع كل كلامها صح ممكن تدحكو عالمعدة بشوية حاجات بسيطة تشربي مية او تاكلي خيار او اي حاجة كده والله بس 3 ايام و بعدها هتتعودي بلاش يا بنات تغامرو بصحكتم و اجسامكم انا خلصت كلامي و ربنا يوفق الكل و تخسو بصحة و عافية
انا مش عايزة ردود ولا تقييم ولا هدفي اي حاجة غير كلمة اقولها عشان لما ربنا يحاسبني يوم القيامة مش اتخد بزنب اي بنت ممكن تجرب دوا و ياذيها
الرئيسية
